कोभिड–१९ सङ्कट व्यवस्थापन समन्वय केन्द्र (सिसिएमसिसी) ले फागुन १ गतेदेखि भौतिक रूपमा विद्यालय सञ्चालन गर्न सिफारिस गरेको छ ।आइतबार बसेको सिसिएमसिसीको बैठकले कोरोनाको तेस्रो लहर ओमिक्रोनको सङ्क्रमण रोकथाम तथा नियन्त्रणका लागि बन्द गरिएको विद्यालय खोल्न सरकारसमक्ष सिफारिस गरेको हो ।
आगामी फागुन १ गतेदेखि बन्द रहेका विद्यालय सञ्चालन गर्न दिने निर्णय भएको सिसिएमसिसीका प्रवक्ता सुनिता नेपालले जानकारी दिइन् । यसअघि माघ १४ गते बसेको सिसिएमसिसीको बैठकले माघ मसान्तसम्म शिक्षण संस्था बन्दलाई निरन्तरता दिन सिफारिस गरेको थियो ।यस्तै, भोलिदेखि लागू हुनेगरी यातायातमा जोरबिजोर प्रणाली हटाउन सिफारिस गरेको सिसिएमसिसीकी प्रवक्ता नेपालले जानकारी दिइन् । प्रवक्ता नेपालले कोरोनाविरुद्धको खोप लगाएका बालबालिकाले स्वास्थ्य मापदण्ड पालना गरेर नियमित कक्षामा सहभागी हुन पाउने र १२ वर्षमुनिका बालबालिका भने आलोपालो कक्षामा सहभागी गराउने गरी सिफारिस गरेको बताइन् ।
