भारतमा सुरक्षाकर्मी र सर्वसाधारणबीच भएको दोहोरो झडपमा परेर असम राज्यका छ प्रहरीको मृत्यु भएको छ ।
भारतको असम र मिजोरम राज्यको सिमानामा भड्किएको दङ्गामा परेर उक्त मानवीय क्षति भएको हो । असमका मुख्यमन्त्री हिमत विश्व शर्माले सीमा क्षेत्रमा विवादपछि झडप हुँदा घटना भएको पुष्टि गरे ।
मुख्यमन्त्री शर्माले सामाजिक सञ्जाल ट्वीटरमार्फत उक्त जानकारी दिएका हुन् । ‘हाम्रा छ जना बहादुर जवानहरुले हाम्रो राज्यको संवैधानिक सीमाको रक्षा गर्दागर्दै आफ्नो जीवन दिएका छन् । मारिएका प्रहरी जवानका परिवारप्रति संवेदना छ,’ उनले भनेका छन् ।
उनका अनुसार सोमबार असाम र मिजोरमको सीमा क्षेत्रमा सुरक्षा फौज र नागरिकबीच झडप भएको थियो । उक्त झडपमा फायरिङसमेत भएको विभिन्न सञ्चारमाध्यामले जनाएका छन् ।
यो घटनालाई लिए असमका मुख्यमन्त्री शर्मा र मिजोरमका मुख्यमन्त्री जोरामथङ्गाबीच सामाजिक सञ्जालमा विवाद बढेको छ । केन्द्र सरकारका गृहमन्त्री अमित साहले दुवै राज्यका मुख्यमन्त्रीलाई त्यहाँ शान्ति स्थापनाको सुनिश्चित गर्न आग्रह गरेका छन् । तर मुख्यमन्त्री शर्मा र जोरामथङ्गाले झडप भएको सीमा क्षेत्रमा केन्द्र सरकारले नै हस्तक्षेप गर्नुपर्ने बताउँदै आएका छन् ।
मिजोरम राज्यको दुई छिमेकी राज्य असम र त्रिपुरासँग लामो समयदेखि सीमा विवाद छ । पछिल्ला दिनमा तनाव र झडप बढ्दै गइरहेको छ । दुई राज्बीचको सीमा विवाद अझै नटुङ्गिएको भारतीय सञ्चार माध्यमले जनाएका छन् ।
