मुलुकका केही स्थानमा आज (सोमबार) भीषण वर्षा हुने सम्भावना रहेको जल तथा मौसम पूर्वानुमान महाशाखाले जनाएको छ ।
देशभरको मौसम सामान्यदेखि पूर्ण बदली भई धेरै स्थानमा भने हल्कादेखि मध्यम वर्षा हुने अनुमान छ । मनसुनको न्यून चापीय रेखा नेपालको तराई भू–भागनजिक रहेको जनाइएको छ ।
जसको प्रभावका कारण मुलुकभर सामान्यदेखि पूर्ण बदली रही बिहानैदेखि प्रदेश १, गण्डकी, वाग्मती र सुदूरपश्चिम प्रदेशका केही स्थानमा हल्कादेखि मध्यम वर्षा भइरहेको छ। दिउँसो देशभर सामान्यदेखि पूर्ण बदली रही धेरै स्थानमा हल्कादेखि मध्यम वर्षाको सम्भावना रहेको बताइएको छ ।
प्रदेश १, गण्डकी , लुम्बिनी तथा सुदूरपश्चचिम प्रदेशका थोरै स्थानहरुमा मेघगर्जन र चट्याङ्गसहित भीषण वर्षाको सम्भावना रहेको महाशाखाले जनाएको छ । सुदूरपश्चिम प्रदेशका केही स्थानमा भने ठूलो वर्षाको सम्भावना रहेको छ ।
राति पनि देशभर सामान्यदेखि पूर्ण बदली रही धेरै स्थानमा हल्कादेखि मध्यम वर्षाको सम्भावना रहेको महाशाखाले जनाएको छ। प्रदेश १, गण्डकी , लुम्बिनी तथा सुदूरपश्चचिम प्रदेशका केही स्थानमा मेघगर्जन र चट्याङ्गसहित भारी वर्षाको सम्भावना छ।
यसैबीच वर्षाका कारण पहाडी भू–भागमा भू–क्षय, पहिरो तथा गेग्रान बहाव र तराई क्षेत्रमा डुबानको समस्या हुनसक्ने जनाइएको छ । नदीनाला तथा खहरे खोलाहरुमा जलसतह बढ्नसक्ने तथा दैनिक जीवन र यातायात क्षेत्र प्रभावित हुन सक्ने भएकाले उच्च सतर्कता अपनाउन मौसमविद्हरुले सबैमा अनुरोध गरेका छन् ।
